Matthew 16
E Huriki a Pariseo
(Markus 8:11-13; Lukas 12:54-56)
1 aNa parava tara e huriki a Pariseo a Sadusi ri valai ri gi tonia e Isu. Ri takia ge ratea tara nivakasiri, ri gi matakilaka vona i valai na Vure.2Pali i koli, i ta maea, “Na malunga, na tahuna mu masia a hunu i vururu, mu lohoka vona bara i kara kuduvi a haro. 3Pali na hatelanga, na tahuna a hunu i vururu, i hupi, mu lohoka vona bara i boru a vala. Mu matakilalea a hini, ge boru a vala, o ge kara a haro. Pali a maka maki iau a rata, i uka ma mu matakilala. 4 bE huriki na tahuna mona, ri hale hateka, ri ha taroa a Vure i manga a ngatavine i ha taroa e kakaina, i mole lae. Ri ngaru ni matai a nivakasiri! Pali i uka ma ri gi masia tara nivakasiri. A nivakasiri i taku kunana bara ri masia, a nivakasiri ne Iona a propet.” Muri e Isu i pe ria i vano.
A Is ne Huriki a Pariseo
(Markus 8:14-21)
5Na tahuna ri page poloa pali a darilomu, e huriki a murimuri ri longo kaburungi ni bole a bret. 6 cE Isu i taki ria, i ta maea, “Mu matadoko vona a is ne huriki a Pariseo, a is ne huriki a Sadusi.”7Lakea ri vakatubu ni vata, ri ta maea, “I ta maea a vuhuna i uka ma si bole valai a bret.”
8E Isu i lohoka vona a niluhoi ne ria, lakea i taki ria, i ta maea, “I uka ma mu luhoi tora hateka. I navai mu vata vona a bret i uka ma mu bole? 9 dI uka ma mu matakilala iau ma. Mu luhoi mule a bret i lima a vakani e huriki ala rangale lima (5,000) vona. I riva a kulopi mu tahoni a kalavana maki ni kani vona? 10 ePali a bret i polorua a vakani e huriki ala rangale va (4,000) vona. I riva a kulopi mu tahoni a kalavana maki ni kani vona? 11Pali i navai ngane mu pahaluhoi ta a taki a bret? Mu mata here vona a is ne huriki a Pariseo, a is ne huriki a Sadusi.” 12Muri ri longokilalea a ngavane Isu, i uka ma i taki ria na is ni rata a bret vona. I taki ria ri gi mata here vona a nitovo ne huriki a Pariseo, a Sadusi.
E Petrus i Taki Tala a Niluhoi Vona
(Markus 8:27-30; Lukas 9:18-21)
13Muri e Isu i luve na tabeke ne Sisaria Pilipi. I nana e huriki a murimuri vona, i ta maea, “E huriki ri luhoia a Tuna Bakovi ge ia e rei muholi?”14 fRi koli ri ta maea, “E huriki ranga ri taki ioe ta ioe e Ioanes a mari ni vahilolo. E huriki ranga ri taki ioe ta ioe e Elaisa. Pali e huriki ranga ri taki ioe ta ioe e Ieremaia, o a propet hosi tara.”
15Lakea i nana ria, “Pali mua? Mu luhoi iau ge iau e rei muholi?”
16 gE Simon Petrus i koli, i ta maea, “Ioe e Kristo, a Tuna Vure Mahuri.”
17 hLakea e Isu i takia, “Simon, tune Iona, a Vure i rata kamumu ioe. I uka tara bakovi ge vakasiria vomu. E Tata na hunu kunana a viri i vakasiria vomu. 18 iA taki ioe, ioe e Petrus. ▼ Ga vakapesi langa na kedo iea a tara nau. A nitora na matenga i uka ma ge ratapilea. 19 kGa habia vomu a nitala na harikianga na hunu. A ra maki o koloa koea na malala, a Vure tara bara i koloa meli na hunu. A ra maki o puga koea na malala, a Vure tara bara i puga meli na hunu.” 20Muri i ta pupukari e huriki a murimuri, nahea ri gi vakalongoa tara viri ne ia e Kristo.
E Isu i Taki Muga Ge Mate
(Markus 8:31–9:1; Lukas 9:22-27)
21Na parava iea e Isu i vakatubu ni vakalongo e huriki a murimuri vona, ne ia ge sike o Ierusalem, ge bole a nimadihi i kupo na limane huriki a gare na lotu, a prister dagi, a mari na vinara na lotu. Muri bara ri rabalakia. Pali muri na parava i tolu, bara i mahuri mule.22Pali e Petrus i tuli lakea na gaga, i vakatubu ni tahatea, i ta maea, “Bakovi Dagi, i uka! A naro iea nahea ge bele vomu!”
23Pali e Isu i mata lakea ne Petrus, i takia, “Satan, o hamule mai a bitogu! Ioe o pesi karia a dalagu. I uka ma o luhoi a maki na Vure. O luhoi kunana a maki na bakovi.”
24 lMuri e Isu i taki e huriki a murimuri vona, i ta maea, “E rei a viri i ngaru ni muri nau, ge lohopile a ningaru vona, ge kalohoa a kai tavalavala vona, ge ramai iau. 25 mE rei a viri i lavuni nau, ne vona ni korimule a kulina, bara i velu. Pali e rei a viri i mate a vuhuna i ramai iau, bara i bole a nimahuri vakaroro. 26 nGe a ra a viri ge tahoka a mahala lobo na malala, pali ge velu a hanuna? A mahala lobo nga, i uka ma ge korimulea. 27 oA Tuna Bakovi bara i valai na bagetuanga ne Tamana turana e huriki a agelo vona, ge habi a mapa ne huriki takutaku, ge muri mai a narone ria. 28A taki muholi mua, i ranga ne mua, ra mu pepesi koea, i uka ma mu gu mate ma, bara mu masia a Tuna Bakovi i luve na harikianga vona.”
Copyright information for
BNP